حكاية حضن ..

( الحضن بلسم يشفي كل الجراح، من يمنحوه ومن يتلقوه)...

قرأت الكلمات دي وأثرت فيا وحسيت اني عينيا اتملت دموع من غير مااحس، الحضن كلمه تسحرني وتأسرني وباختصار كلمة بتلخص معاناتي.. ايوه لما قرأت العنوان ده لمقالة عن الحضن حسيت انه هو ده احتياجي وهو ده نقصي ونقطة ضعفي.. كبرت وبابا مابقاش بيحضني وماما ماافتكرش ان هيا حضنتني غير وانا صغيره.. حسيت اني مظلومة وانا لسه طفلة محتاجة احس بالاهتمام والحب والحضن، دايما خايفة، دايما قلقانة، دايما ضعيفة، دايما بحس اني نقصني حاجة مش قادرة اعرفها.. وعرفتها ومش عارفه اخدها.. وماينفعش اطلبها!!
ليه يابابا بطلت تاخدني في حضنك وتحاول تتكلم معايا، ليه بعدت عني وبقيت تعاملني اني بنت وكبرت وماينفعش تعمل كده معايا..! اروح لمين بضعفي واحتياجي وخوفي؟! استخبى في حضن مين من الدنيا وقرفها ووجعها والناس؟ اشحن طاقتي واحس ان ليا قيمة واني في حد بيحبني وبيخاف عليا مش بس كلام؛ وفعل!!
فجأة حسيت اني لوحدي وجنبي ناس كتير.. لوحدي باحتياجي وضعفي.. انا فين؟ وعايزه ايه؟ وليه حاسه بكده!! وليه ببعد اي حد يقرب مني! ليه بكون ضد نفسي!
لازم اواجه نفسي، واعوض نفسي عن احتياجي للحضن واحساسي بالامان.. اكيد انا مش لوحدي حاسه بكده واكيد في غيري اكتر مني لكنهم اقوى مني!! ايوه الحضن هو اللي ناقصني وهو اللي محتجاه وهو اللي بيعوضني وهو اللي بيديني طاقه ويخليني اشوف الدنيا حلوه واحس ان ليا قيمة.. بس مش هو كل حاجة .. بحضن مخدتي وانا نايمة ومبعرفش انام من غيرها.. وهتعلم اعيش قويه ومااسيبش احساس زي ده يأثر على حياتي ويضعفني .. مش هكون اسيرة لظروفي وحالتي النفسيه..
انا بكتب الكلام ده وعارفه انه ممكن محدش يقراه وهو مجرد فضفضه مليانه دموع ..

تصبحوا على حضن اللي بتحبوه ..
تصبحوا ع خير