فضفضة

الهدوء والجنون أكتر حاجة تميزني المرحلة الحالية .. مدايقة وسافرت عشان ارتاح وابعد .. رجعت برضو مدايقة .. نفسي اتنطط واصرخ نفسي في نفس الوقت اقعد قدام البحر طول اليوم من غير ولا كلمة .. زهقانة من الكتب .. زهقانة من الناس .. في نفس الوقت عايزة اشوف الناس بس مليش مزاج .. بكون جعااااانة اوي وأول ما اشوف الأكل مبقاش قادرة أكل .. بقيت مش عارف ان مين! وأيه اللي يفرحني؟!

طول عمري عارفة عايزة ايه من حياتي او على الأقل راضية بيها، فجاة كل حاجة كنت بأمن بيها مبقتش تقنعني وكل حاجة عشت مقتنعة بيها فجاة شفتها بعين تانية .. قلبي اتغير .. وانا اتغيرت .. كرهت إحساسي بالضياع .. كرهت اني بستنى حاجة مش عارفة هيا ايه ولا هتيجي امتى!!  تايهة وعمري ماحسيت بكدة .. بكره احتياجي لحد واحد بس هو أكتر انسان بعيد عني .. بكره احتياجي ليه وحبي ليه وصبري عليه ضعفي ناحيته .. بكرهه وبحبه ..

بكره اني بدعيله حتى وهو بياذيني .. بكره خوفي عليه .. بكره لهفتي عليه وبكره اني بحب اشوف اسمه وبكره لما قلبي يدق بس من اسمه وسيرته .. بتوحشني نفسي ايام زمان .. كانت اقل حاجة تفرحني .. انا في مرحلة اللاانتماء .. اللاهوية .. اللاحدود لكل حاجة حتى لنفسي .. حلو الجنان بس بعده احساس بالفراغ اللي صعب انه يتملي .. صعب كمان انك تملي قلبك بحد مش موجود .. صعب جدا انك تحاول تخليه موجود ف حياتك وهو مشي .. صعب اوي الدمعة لما تنزل من وجع مش قادر تقوله ..

اكيد مش انا بس اللي بحس بكدة بس انا في المرحلة دي كل حاجة بتوجعني وبتجرحني وبتخليني اتجنن في نفس الوقت .. اكيد هلاقيني بس مش عارفة امتى .. وهبقى عاقلة بس مش دلوقتي .. لكل حد ليقرأ كلامي اعرفه او معرفوش أتمنى انك تعيش الجنان بس مع الانتماء .. أتمنى انك تلاقي الانتماء لكل اللي بتحبوهم .. الامان مع اللي تتمنوهم ..

 

 

أتمنى ...